छत्तीसगढ़ी के कहावतन म पूरा के पूरा दंतकथा समाए हे,
छत्तीसगढ़ी कहावत ‘जइसन ला तइसन मिलै, सुन गा राजा भील. लोहा ला घुन खा गै, लइका ला लेगे चील’ म पूरा के पूरा कहानी समाए हे.
- News18Hindi
- Last Updated:
September 7, 2020, 3:49 PM IST
एक गांव म दू मितान आस पास म रहत रहिन, दुनों म प्रगाढ़ मित्रता रहिस. एक पइत एक मितान ल कोनो काम ले दूरिहा कोनो गांव जाना रहिस. ओखर तिर वरदान म मिले लोहा के एक भारी तलवार रहिस, ओ हर सोंचिस के वो भारी तलवार ल बाहिर गांव ले जाय के जगा अपन मितान तीर सुरक्षित रख देवय अऊ वापस लहुट के ले लेवय. ओ हर वइसनेच करिस अऊ तलवार दूसर मितान के घर रखके गांव चल दीस.
कुछ दिन बाद वो ह वापस अपन गांव लहुटिस अऊ अपन मितान ले अपन तलवार ल मांगिस, फेर मितान लालच म पर गे अऊ तलवार ल हड़पे बर बहाना बना दीस के वो तलवार ल तो घुना खा दीस. तलवार के मालिक ह मितान के ये व्यवहार ले अड़बड़ दुखी होइस फेर कुछ नइ कर सकीस.
समय बीतत गीस, बात आए गए हो गीस. कुछ समय व्यतीत होए के बाद दूसर मितान ल घलोक कोनो काम ले बाहिर गांव जाना परिस. ओला जल्दी जाना रहिस अऊ परिस्थिति कुछ अइसे बनिस के ओला अपन छोटे लइका ल मितान तीर छोड़ना परिस. काम निबटा के जब वो वापस गांव लहुटिस अऊ अपन लइका ल मितान मेर ले मांगिस त मितान ह कहिस के ओला तो चील उठा कर ले गए.दुनों के बीच लड़ाई बाढ़ गए अऊ बात भील राजा के दरबार म पहुचीस. राजा ह मामला सुनिस अऊ समझिस, ओ ह न्याय करत तलवार ल दबा लेवइया मितान ल तलवार वापस देवाइस, मितान ह ओला ओखर लइका वापस दे दीस. तेकरे सेती ये हाना ल बोले जाथे ‘जइसन ला तइसन मिलै, सुन गा राजा भील. लोहा ला घुन खा गै, लइका ला लेगे चील.’
